أنا الفلاح----على باب الكريم طالع
ماليش فى الشرّ والطالع
وجوّه القلب كام شريان
يعاتب نفسى ويصارع
ولما اخلو باحلامى-يدوب الماضى فى مضارع
أنا الفلاح--أنا الشقيان أنا البارع
ماليش إلاّ فى ضربة فاس
وكاسة شاى ,سهراية
بترسم ع الوشوش إحساس
ماليش فى ملاوعة الساسة
ولا ليّا فى وجع الراس
*****
ومن يومنا إيدين واحدة
ونعرف كيف نخاوى النيل
وإن العزة فى الوحدة
وان اللمّة تنفعنا---وتدفعنا حدا الشِدة
ولو ترمى على الشباك ولو طوبة
دا عيب وحرام
وإنّ لسانك الزالف من الإجرام
ولانعرف نكون أصنام
ولاخلبطنا فى الفيس بوك-ولا تويتر ولاويب كام
وكان أخلاقنا منهجنا وكل الصحّ فى الإسلام
لانعرف لاصقة ولامنقوع
ولاننصب ولو هنجوع
*****
لا مرة طلعنا بمظاهرة-وعشنا عمرنا مسالمين
ولاعطّلنا يوم ساقية—ولازهّقنا فى الفدادين
ونتفاخر بأكتوبر—وأهرامنا بنن العين
ونيلنا قالها م الآخر---هنحميها ليوم الدين
وفجأة تهنا فى التوهة—بنسمع كل يوم براكين
غلاء الثورة نوّرنا—وحتى اليُتم والقرابين
نودّع كل يوم أحباب—وسال الدمع جوّه العين
وشوش الخلق قلقانة—وضاع الفرح فى التأبين
وآه يامصر ليه صرتى بقلب حزين
طب اشكى لمين
سوى للخالق القادر---عظيم الدنيا والعالمين
عظيم الدنيا والعالمين
إرسال تعليق