وحشاني يا أمّي
@@@@@@@@@
أول كلمه نطقها لساني
نفسي اقولها ف حضنك تاني
اجمل كلمه واجمل همسه
فيها الحب وفيها معاني
أمي حببتي يا ضي عينيه
صوتك ساكن جوه وداني
مهما تمر سنين وسنين
بردو يا ست الدار وحشاني
أمي حببتي يا ضي عينيه
نفسي أقولها ف حضنك تاني
نفسي أنام علي حجرك مره
نفسي أشوفك حتي ثواني
زي الشمعه ف قلب الدار
نورها ينور جوه كياني
ضلمه الدنيا بعد رحيلك
مين هيعوض تاني مكانك
إيدك بلسم يشفي جروحي
لمسه إيدك لما أعاني
تمحي هموم الدنيا ف قلبي
ألقي الفرحه ف قلبي أغاني
فاكر كل كلامك ليا
دفعه قويه دفعه عفيه
لكن بعد رحيلك عني
مين هيخفف من أحزاني
مين هيشيل من عيني الدمعه
مين هينور تاني الشمعه
لو كان صوتك كان قواني
عمري ما هنسي كلامك ليا
إبني ضنايا حبيبي الغالي
أجمل كلمه جوه وداني
كلمه تأثر فيا كتير
كلمه تغير من وجداني
وسط ظلام الليل بتصلي
تدعي المولي يزيد إيماني
تدعي لأبويا واخويا وأختي
دعوه تحقق كل أماني
فاكرك يامه لما تقولي
إبني ضنايا حبيبي الغالي
بكره هفوت الدنيا يا ولدي
إوعي ضنايا ف يوم تنساني
خليك فاكر كلمة أمك
خليك حافظ للأحساني
تسعد طول العمر يا ولدي
تسلم من كيد الشيطانِ
أيوه يا أمي أنا هفضل فاكر
صوتك ساكن جوه وداني
صورتك ليل ونهار قدامي
آه لو يرجع تاني زماني
كنت هقولها بصوتي العالي
أمي يا أحلي الناس وحشاني
@@@@@@@
بقلم /////// طه إبراهيم
إرسال تعليق