هكذا تمضي السنين
تحي ميت..أو تموت ناس كتير متعشمين
:
هكذا تمضي السنين
:
هكذا تمضي الشهور
ع اللي مدفون في الصدور
اللي حابب
واللي كاره
واللي مليان بالكسور
واللي تايهة ملامحه منه
مش عارفها تايهة فين
هكذا تمضي السنين
:
هكذا تمضي الليالي
ع اللي ناسي
واللي خالي
واللي فاكر نفسه غالي ساب مشاعره للحنين
هكذا تمضي السنين
:
هكذا تمضي السعات
ع اللي عدا واللي فات
واللي لسه رامي قلبه جوه علبة ذكرايات
يفتح العلبة يلاقيها
عدا ألف زمن عليها
م الألم ويا ألأنين
هكذا تمضي السنين
:
هكذا تمضي الدقايق
ع اللي ساهي
واللي فايق
واللي ناكر للحقايق
واللي باصص للخلايق
مش عارفهم يبقو مين
هكذا تمضي السنين
:
هكذا تمضي الثواني
عاللي عارف نفسه جاني
واللي مليان بالأماني
واللي كسر ذكرايته
بس ناوي يبني تاني
واللي صابر عاللي غدرو
واللي راضي يعيش حزين
هكذا تمضي السنين
=
محمد عبدالفتاح أحمد
هكذا تمضي السنين
إرسال تعليق