حلم مش مظبوط .......!!
ـــــــــــــــــــــــــــــــــــــــــ
جرب مش حتخسر حاجة
انك في يوم تكون مهم
بقولك جرب .......
حتلاقي كتير
من اللي بيدوروا
أزاي يوصلوا
حيعفوا عليك كما الدبان
الكل عاوز يقدم خدماته
هو عارف إيه أدواته
بدون مقابل كدا قدامك
كلام جميل يتزوق عشانك
ياسعادة البيه
ياباشا أمال أيه
ومن وراك يلعن سلسفينك
ولو في مرة وقعت
الوشوش فجأة تتغير
الابتسامة تبقي بحساب
اللي كانوا حواليك تبدأ تتسرب
النهاردة مش فاضي
وبكرة راح تعمل قاضي
أعذار ورا أعذار
ومركبك غرقانه
الكل فط وطار
وبقيت يا مولانا
كالصيني بعد غسيله
أبيض آه يانا
جربت خلاص ؟!!
إيه رأيك بقي وأنت غني
طب أيه رأيك وأنت مهم
الدبان راح فين ؟؟
والأنعرة الكدابة
قوم خلاص اصحي من النوم
معدش بقي ليه لزوم
عيش حياتك وأشكر ربك
إن ده حلم مش مظبوط
ــــــــــــــــــــــــــــــــــــــــــــ
بقلمي / محمود مسعود ( عامي ) 21/10/2016م
إرسال تعليق