قصيدة / ( الفراق )
بقلمي / هدى سيد
يا حبيب العمر فينك
ليه فراقى هان عليك
هو ده وعدك يا غالى
ايدي ما تفارق ايديك
ليه نقضت الوعد ليه
ليه رحلت بدونى ليه
غابت الشمس بغيابك
والسما نزلت دموعها
من حنينها وشوقها ليك
قلبى سبقك ع التابوت
فضل انه معاك يموت
والمكان سادو السكوت
ليه مكانك جنبى فاضى
ليه بعذابى حبيبى راضى
صدقنى شايفاك قصادى
صورتك ماليه نن عينى
صوتك سامعاه بينادينى
حاسه ايدك لامسه ايدى
شايفه عينك حاضنه عينى
رعشة صابت جسمى كله
لما حسيتنى ف حضنك
سيبتنى ورحلت عنى
وانت ساكن جوه منى
طب وحبك يا حبيبى
لو بايدى... تكون نهايتى
وانهى م الدنيا حكايتى
بس خوفى من عذابه
يرفض ما يدخلنى بابه
لسه فيه ف العمر حبه
حانتظرهم حبه... حبه
و فذكرياتك هاستخبى
بس اوعى تنسى تيجى
تزورنى دايما فى المنام
تطبع بوسه فوق جبينى
وتونسنى ف الاحلام
حاستناك يا نن عينى
ودموعى ماليا سنينى
لما ياذن لى ربى
والجنة تجمعنى بيك
إرسال تعليق