* رساله من شهيد بقلـــــم: عـــــادل الشــــــهــابى

****** رساله من شهيد ******

يا أمى بلاش تبكى وتنوحى ....

خدى أبويا وأخويا فى أديكى وروحى ..

وأنصبى صوان التهانى يا أمى وأفرحى ..

يا أمى أضحكى وما تبكيش ...

مت أنا علشان بلدى تعيش ..

أظهرى يا أمى قوتك وماتنهزميش ..

يا أمى والله أنا هنا سعيد ..

والملايكه حواليا يا أمى أنا فى عيد ....

ومن بنات الحور بختار يا أمى من جديد ..

يا أمى وصى أخويا يكون مكانى ...

وانا هنا مستنيه وأديلوا يا أمى عنوانى ..

قوليله لقب شهيد من أحلى الاسامى ..

قوليلوا ياخد سلاحى ويروح يحمى بلادنا ..

دى أمانه سابتهالنا يا أمى اجدادنا ...

وصييه أنه من الموت ما يخاف ..

ده اللى هنا يا أمى فى جماله لسه ما تشاف ..

انهار من لبن مصفى ما بتخلص اطمن وما تخاف ..

زى ما علمتينى علميه حب الوطن ..

أسأليه اللى بدون وطن فين راح يندفن ..

ومين راح يسأل فيه ويجيبله حق الكفن ..

هدومى يا أمى ما تغسليهاش ...

خليها بعطر دمى علشان أبنى ما ينساش ..

قوليلوا الى بدون وطن بين الناس ما يسواش ..

بدمنا يا أمى روينا ورود ...

علشان البسمه والامان للأولادنا تعود ..

نحميكى يا مصر تانى وتالت ومليون وبدون أى وعود ..

نموت فداكى الف مره لو الروح من تانى تعود ..

يا أمى من السواد قومى غيرى هدومك ..

وأحمدى ربنا أنه قدرك أنك تقومى بدورك ...

وأطلبى منه يزيل عن مصر همها وعنك يا امى همومك ...

وخدين عهد على نفسنا نصون مصر يا امى ونصونك ..

ونشيل الدمع من عيونها يا حبيبتى وعيونك ...

يا مصر من يقدر من ولادك المخلصين يخونك ..

بقلـــــم: عـــــادل الشــــــهــابى