إعدام
من ديوان مملكة الخيال
فاضل كام ؟
نفّض جيبك .. م الأيام
ودّع عمر اتاخد منك ..
غصبن عنك
وادبح شوقك .. والأحلام
سلم آخر لحظة فى إيدك
واطفى الشمع الباكى فى عيدك
إعزف لحن مسافر .. وارحل
داللى بقيلك ..
لوعة نفس ودمع بحرقة
حبة قرب اتحنوا بفرقة
هى الغربة ..
ديما تسرق فرح العاشق ..وتخبّيه
وتعذبه على قد ما تقدر .. وتأسّيه
يرحم قلب الحب الميت ..
واللى معذب قلبك بيه
ريّح من أوهامك روحك
وامسح دم مغطى جروحك
جهّز قبر سكوتك واخلص .. م الحرمان
شد لجام الصبر وعطّر ..
قسوة يومك .. بالنسيان
واغزل كفنك .. من حواديتك
وانسى قصايد ..
كنت بتبكى معاها زمان
ملّس على إحساسك
واخنق .. نبض الآه
ماتفكرش وسلسل عقلك
ماتعشمش النفس تحس بطعم حياه
دوامة ولازم تتحمس .. تغرق فيها
وتمجّد كتمة أنفاسك .. وتحييها
يابن الوجع الدايم أحسن ..
تلغى وجودك
وتقطّع ورقك .. وورودك
وتهد المعبد وتغرّق ..كل حدودك
إمحى عهودك ..
نكّس علمك ..
لملم نياشينك .. وادفنها
وافرش أحزانك .. واتمدد
واكتب إسمك ..
وسط السطر الفاضى .. ونام
دا الحكم الصادر م الدنيا ..
ع القلب الطيب .. إعدام
******************
إرسال تعليق