سالى
من ديوان مملكة الخيال
عيونك عيونها
ولونك فى لونها
يا أحلى ابتسامة ..
بسافر فى كونها
رسمتك طريقى
وإسمك صديقى
يا سالى وما سالى دموع الدموع
عرفتك بقلبى
وشوفتك بروحى
ودمك نده لى
سمعته بجروحى
ويصعب عليّه
أعذينى فيكى .. واعذيكى فيّه
يا قصة وكتبها الزمن بالأسية
وسلمها عمرك ..
للبلطجية
فدو لحبيبتك ..
مصر اللى حبّت ..
أجدع صبيّة
شوية القصايد
ووصف المعانى
وحبر الجرايد
وكل الأغانى
صمودك طلاسم كتبها التاريخ
يانبتة حضارة
ورقها الجسارة
وعودها الشباب اللى فل الحديد
وعدّى السواد اللى فوق الكبارى
وزاح اللوارى
وبرّك جمال الخيانة الجبانة
وخلّى الشوارع عشانك تقيد
تحية لشبابك
وحقّك عليّه
يا ثورة وغضبها جمع مليونية
ياأطهرها نيّة
مش هابقى تانى السكوت اللى كان
يلعنها دنيا ..
لو بعد منّك أعيشها بهوان
بدأتى الحكاية
بأصعب بداية
وخدتى بإديّه ..
لأعظم نهاية
ياريتك معايا
ياريتك تشوفى الميدان الليلادى
وصوت انتصارنا ..
بيهتف بلادى
وحلمك من الفرحة ساجد بيبكى
وصورتك بتلمع ..
فى وش الأعادى
***********
محمد درويش
إرسال تعليق