وسط الكلام انا قولتها
وحط خط تحتها....!!
ايوا غريب...
لما اشحت الراحة في بيتي
قصدي اللي كان بيتي
يقتلني العشم...واروح ابات عند الجيران
مابقاش خلاص...ف الحي كله الا صوتي....!!
كل البيوت بقت تراب...ريحة تراب
ريحة مكان كان من يومين...فيه الشباب
كان فيه محل الخردوات....وهناك وقفنا بالساعات
وعم(شافع)نجار قديم...شباك وباب
راجل عجوز ....لكنه كان....ياه ع النصيب...ياه ع النصيب
ايوا غريب...
تحت التراب مديت ايديا طلعت عروسة
كنت اشترتها زمان لبنتي...وااااااااه يانورا
راحت خلاص ...مافضلش منها الا صورة....!!
بس الغريب....
ورقة كتاب مكتوب عليها نشيد قديم
نشيد حفظته من زمان...قبل الجحيم
(وطني حبيبي الوطن الاكبر...يوم وري يوم امجاده بتكبر
وانتصاراته ..ماليه حياته...وطني بيكبر وبيتحرر)))
الله اكبر الله اكبر....فين العُرب يشوفوا المنظر
يجوا يشوفوا اللي بيتحرر....!!
كل الوطن العربي ده منظر....
والكومبارس الشعب العربي....
اللي يدوق الذل الشعب....واللي يخش السجن الشعب
والابطال هم الحكام....بيروح عربي بيجي الغربي
دايرة اتقفلت ...يوم وري يوم عمالة بتصغر
يعني الواقع كله كئيب....!!
ايوا غريب...
يبقي العربي في وطنه غريب
لما الشعب العربي يفوق...هبقي ساعتها اغني غناكم
هبقي ساعتها اهتف وياكم...
وعمري ما اقول ع نفسي غريب....!!
احمد الصارم
إرسال تعليق