رحتى فين ؟؟
ـــــــــــــــــــ
رحتى فين يا ضحكتى
باللهِ قولى رحتى فين
تهتى ف خطاوى سكِّتى
ولَّا عصف بيكى الأنين
باللهِ قولى رحتى فين
بدوَّر عليكى جوَّايا
مابين بكره وأسى أمسى
ويدوَّر ألمى ويَّايا
ويقول يا مركبى إرسى
وازَّاى ترسَى بدون شطِّين
باللهِ قولى رحتى فين
بضْحك يمكن افتكرواضحك
و دندن غنوتى تانى
ألاقى بكايا اللى بيضحك
من ضحْكتى وهزيانى
ويقول ما شفتش فى الاسى
أكتر من ضحكتك ياحزين
بالله قول رحتى فين
آه من وجع الحروف
لمَّا تتوه بين المشاعر
وتوه معاها فكرتك معاد تشوف
ما يِلْقهاش ولا ألف شاعر
أهات فى أهات متخبِّلين
باللهِ قولى رحتى فين
آه يا ليل الغريب ياما انت قاسى
آه يا قلب الحبيب نكَّار وناسى
آه يا حلم اتقطف من غير أوانه
آه يا لوعة أصيل خانه زمانه
عصرانى بين حسره وحنين
باللهِ قولى رحتى فين
بدوَّر علَّى ومش لاقى
واسأل نفسى عن نفسى
مشتاق للحظة تلاقى
اطَّمِّن فيها على نفسى
انا تهت منِّى ورحت فين
بالله قولى رحتى فين
عاشرت ناس من بعد ناس
وفرشت قلبى وانا راضى
واللى فرش قلبه بينداس
أصل الاحساس كلام فاضى
ولا حد يسأل دا قلب مين
باللهِ قولى رحتى فين
بقَلِّب بقلبى قلوب الناس
ألاقى فى النفوس توهه
واسأل ايه جرى للناس
ألاقى الكلمه مستوهه
وأهل المروءه تعبانين
باللهِ قولى رحتى فين
سبحان الحى اللى مايغفل
لِفين يا غفله وخْدانا
وكل الناس كدا بتسأل
أُمَّال مين اللى ودَّانا
وأدينا ف دنيا الويل عايشين
و خلاص عرفت رحتى فين
انت فى الهم والشكوى
وحكاوى ليل المحزونين
انت فى التُّوهه والنَّجوى
وحنايا روح الغلبانين
خلاص عرفت انت فين
انت فى دروب الطاعه بتمرحى
وف معيِّة رب القلوب بتطوفى
بتقولى زهد الناس دا بيتى ومطرحى
والصبرع الأزى مدادى وحروفى
ولو عايزنى تلقانى فى اليقين
خلاص عرفت انت فين
وحنْزعك من عِنْد قلب جبال الهم
وفتَّح ورود الأمل فى ضْلوعى
واطوى بالاراده بواقى الوهم
و بحكمتى ابدر بهاكى فى ربوعى
و لا عدت أسأل رحتى فين
يا ضحكتى رحتى فين
،،،،،،،،،،،،،،،،،،،،،،،،،،
محمدامام
إرسال تعليق