أنا حابب أكون أنسان
للشاعر : محمد ضباشه
أنا حابب اكون أنسان
ولو غلبان أنا راضى
بس ما اعيش متهان
أو رقعة دايبه فى الماضى
لا أنا طالب أكون ريس
ولا فنان ولا قاضى
ولا طالب رضى الكرسى
ولا عقلى يكون فاضى
أنا حابب أكون أنسان
ولو توبى بلون الطين
ازرع فى القلوب وردة
وأفرح كل قلب حزين
وأسامح اللى ظلمونى
وأدور على اللى كانوا غايبين
أقدم كوب ملان بسمة
ولقمة بملح للغاليين
اللى ما باعونى ولا مره
وظلوا فى الحياة راضين
أنا طالب اكون أنسان
ولو تعبان ومش لاقى
لقمة اسد بيها الجوع
أو حتى حقنة لدوائى
كفاية سرقتونى منى
وصبيتوا القهر فى امعائى
بجهل ملوش معنى
وكاس لكلنا ساقى
شراب بالمر متعكر
وعكر كل شيىء باقى
أنا حابب أكون أنسان
وهكون أنسان بأفعالى
وهحقق فى الحياة حلمى
وطموحى وكل أمالى
وهبنى الصرح بالعافية
مدام راضى بأاقوالى
وهخسف بالجبان أرضى
وأغير كل احوالى
واقول يارب قوينى
وكتر كل أمثالى
إرسال تعليق