من الأرشيف -- (( قصاقيص ورق ))
--
ونا اللى بحلم يوم أجيب الكوكبه
من فوق سحابه زى رواد الفضا
وارجع بطل
--
على راسى تاج
وسدرى شايل من جميع الأوسمه
--
**********
قصّيت ورق
ولزقت فيه كل الصور
--
نجمه وقمر
على بوصه من هيش البرك
دوّرتها
--
ربّعتها
وحاجات كتييييير
--
زوّقتها
وجعلتها على شكل أفراح السما
الديل طويل
--
الديل طويل
شراشيب زواق
ولما أنده تنطلق
--
جناحين براق
وتكون هناك والديل هنا
طيّرتها
تروح يمين أخاف تقع
وتروح شمال -- ألمّها
وتستمر وتستمر -- وتستقر
أسيب لها -- أسيب أسيب
الخيط طويل -- الخيط طويل
يادوب يطول أول سما
أم الصور أم النجوم ويّا القمر
عليت لفوق -- لفوق لفوق
وصلت لآخر منتهَى
وعندها بدا الصراع
مع كل ريح طال النزاع
واتكتّلت كتلة هوا -- قطعت خيوط المركبه
قوام قوام -- خسرت حبيبتى المعركه -
----------------------
ديوان الطبليه
----------------
شعر / عزت عبد العال -- طنطا
إرسال تعليق
الابتساماتانقر لرؤية رمز الإبتسامة
لإدراج التعبيرات يجب إضاف مسافة واحدة على الأقل