إهداء إلى بلاد السحر و الجمال ، و ناسها الجُمال.
إلى عبق الماضي و روح التاريخ :
( جواب لأسوان )
اليوم جيت أكتب جواب لأسوان
بس خايفة ما أعْرِفشي
يا مفسرين الأسباب
أقول و لا ما أقولشي
قالوا :احكي يا صبية
و ما تكتريش الملاغية
لا تمل منك نعيمة
و لا تسمع لك بهية
………………………
أول كلامي سلام
يطير كطير الحمام
يعدي حدّ المداين
لا يهمه شمس و لا غمام
………………………
النيل نجاشي حليوة و أسمر
طالع يخضر...... نازل يخضر
يهدي سلامي ياسمين معطر
و يروي العطاشى شهده المكرر
دا النيل نجاشي حليوة و أسمر …………………
قالوا:الأصل في دمه..
أنا قلت :أسواني
قالوا:الطيبة في رسمه..
أنا قلت :أسواني
قالوا :الهدوء طبعه
قلتلكم...بردك أسواني.
………………
تدور الساقية ما تتعب
و قلبي يسافر و يتغرّب
لا بينسى يوم تاريخه
و لا منه الحنان يهرب!!!!
كمثل النهر في شوفته
بيداوي و بيطبب
………………………
عجبي...عجبي على بلدي أنا
و سلام على إلي كتب أسوان
اختار حروفها بنغم
رسم فيها الجمال ألوان
و اتفرج يا سلام
على نيلنا في أسوان
دا محني كفّ المداين
قبل الزمااااان بزمان
و النخل طالل علينا
يحضن جريده المكان
و قمراية في الليلة ضوّت
نامت عيونها بأمان
…………………
لا هكسوسي صابها
و لا يوناني نابها
و جوها العبايدة...
فتحتلهم أبوابها!!!
صعيدي ، نوبي ، مشاري
كلنا أخوة في رحابها
……………………
دا القلب عربي
و الدم مصري
و الاسم أسواني
في عيني راسمة حمودي
و في النني كاتبة رحماني
يا طِيب طيبة يا أكتر من أكتر
و لجلي كريمة ها أقول و أكرر
دا النيل نجاشي حليوة و أسمر طالع يخضر نازل يخضر
يروي العطاشى شهده المكرر
دا النيل نجاشي حليوة و أسمر
و أهديكم سلامي ياسمين معطر.....
بقلمي (إيمان المصري )رحيل.
إرسال تعليق
الابتساماتانقر لرؤية رمز الإبتسامة
لإدراج التعبيرات يجب إضاف مسافة واحدة على الأقل