على قولك
--------------------
وبتقولي إني مقتولك
على قولك ما انا ميت
و موتي كان فدا عيونك
أنا الهايم في أشواقي
و انا العايق في أزواقي
و أنا اللي سمحت بإيديا
أكون من ضمن مخزونك
على قولك
دا لون الفرحة من لونك
و بس يكون في معلومك
نهاية قصتي توبك
يا إما تغزلي الفرحة
يا هتخليكي بعيوبك
فقبل ما تلبسي طرحة
تعالي قيسي منسوبك
و موج الفقر لو جارح
فانا امبارح لا عايز حد ينزلي
و لا ضلك لمح ضلي
و لا مخاصم و لا مصالح
على قولك
أنا ضلك
و توب الفرحة هغزلك
لكني مش على الهامش
تقولي يمين أقول ماشي
تقولي شمال ميجراشي
و فاكرة الضل خدامك
تملي تحت أقدامك
و حتى الآه ما حساشي
دا شمسي لو تغيب عنك
يغيب ضلك
و نور الشمس لو يرحل
شموع الليل ما ديماشي
فلو هتزيدي في جروحي
جروحي كتير ما نقصاشي
و لو فكراني يوم هنسى
فانا فاكر ما بنساشي
فكيف هغزلك الفرحة
و انا شايفك ما عيزاشي
على قولك
فقولي و كملي قولك
يا كاسية الكل من وهمك
و وهمك غزله من نولك
على قولك
----------------------
تحياتي
إرسال تعليق