كُبَّة: لا راس .... ولا رقبة*عبد الغني عبده

عبد الغني عبده

كُبَّة: لا راس .... ولا رقبة
شخبطها:- عبد الغني عبده
***
كان نفسي يوم اطلع عَوَّاد...
على قهوة أضرب للرواد...
لكين قلبي ما جابنيش "أضرب" الوتر؟!!
وقال وهو بينفطر:-......
"الضرب بيفكرني بالماضي البغيض....
حيث العبيد..... والسيد"!!
***
أنا قلت طب هالعب "كمان"...
واعزف لنفسي .... وللزمان مقطوعة...
لكين منين أجيب إيدين؟!
وإيديا مقطوعة.... فـ حادثة قطر مشهورة....
وقعت لجدي من آلاف السنين...
ودون عن كل أحفاده... ورثت منه "الجين"؟!!
نعق غراب البين....
من فوق غصين السنط وناداني...
لما انتبهت.... نزل على الحفرة ورَّاني....
إزاي أواري عورة "المقتول"!!
***
فيها إيه لو اغني؟!
لكين "القطة" من زمان كلت لساني!!
أنا كان لساني "طويييل"...
وكنت متلفح به....
القطة نطت فوق كتافي....
خطفت لساني لآخره!!
من يومها كل اللي يسمع صوتي بيعاني...
وكلامي حاير فيه الترجمان!!
وما يفهموش غير الهموش...
والبغبغان ما يرددوش.... غير تهتهه!!

***
حبيت في يوم أرقص
منعتني تكتيفتي...
رجليا خلف قفايا....
ومعايا متقيد في نفس السلسلة قردين ونسناستين وحمارة.
سألت واحد مشرد ناسي مين هوه....
رمى لفافة الحشيش من بين صوابعه.......
وزغر لي بعنيه اللي زي الدم....
وقالي مش محتاج مشورة يا عم، انفخ في زمارة...
طيييييييييييييط!!
طيييييييييييييط!!
طيييييييييييييط!!
التفوا حوليا البشر ... ضحكوا وقالوا:- عبيط.
؛؛؛؛؛؛
الجيزة – في 21 يناير 2013.